Belarusun avtoritar lideri Aleksandr Lukaşenko 31 ukraynalı vətəndaşı əfv edərək azadlığa buraxıb. Bu, ABŞ prezidenti Donald Trampla əldə edilmiş razılaşmanın tərkib hissəsi olaraq gerçəkləşib.
Ukraynanın məhbus mübadiləsi üzrə koordinasiya komitəsi noyabrın 22-də Belarus rəsmilərindən mülki şəxsləri təhvil aldıqlarını bildirib.
"Belarusda saxlanılan və iki ildən 11 ilədək müxtəlif həbs cəzalarına məhkum edilmiş qadın və kişilər Ukraynaya qayıdırlar", – komitə Telegram-da yazıb və ABŞ prezidenti Trampa təşəkkür edib.
Həmin şəxslərin hansı ittihamlarla saxlanıldığı aydın deyil. Ukrayna rəsmiləri onların "Ukraynayönlü mövqeyinə görə saxlanılan, Ukraynaya kömək etməkdə günahlandırılan mülki qadın və kişilər" olduğunu bildirib.
Lukaşenko Rusiya prezidenti Vladimir Putinin yaxın müttəfiqidir. O, son bir ildə Qərblə münasibətləri yaxşılaşdırmaq məqsədilə bir neçə dəfə məhbusların buraxılmasına razılıq verib.
Belarus lideri bununla Qərbin sanksiyaları yumşaldacağına ümid edir. Sanksiyalar isə onun Rusiyanın 2022-ci ilin fevralında Ukraynanın tammiqyaslı işğalında dəstəyinə görə tətbiq edilib.
Daha öncə azadlığa çıxan məhbuslar işgəncə və pis rəftar hallarından danışıblar.
Tramp isə daha çox məhbusun azad edilməsi niyyəti ilə Belarus üzrə xüsusi elçi təyin edib.
ABŞ prezidenti avqustda Lukaşenko ilə telefonla danışaraq çoxlarını təəccübləndirib. O, sentyabrda bildirib ki, ölkənin saxladığı yüzlərlə siyasi məhbusun bir çoxunun azad ediləcəyinə inanır.
"Onların 1400-dən (Belarusdakı siyasi məhbus sayı) çoxunu azad edəcəklərinə inanıram", – Tramp sentyabrın 5-də jurnalistlərə deyib, bunun yaxın gələcəkdə baş verə biləcəyini əlavə edib.